Κυριακή, 12 Οκτωβρίου 2014

με τη γαρήμ κεπορώ να βγάλατα πέρα ..





Γράφει η Μαγδαληνή Σελίδου

20 Αυγούστου 2014
στην ανεμοκαλίτσα

(facebook Magdalini Magi)

 





με τη γαρήμ κεπορώ να βγάλατα πέρα ..


εκάτσα κα, και ετσίμιξα το τσιμίδιμ. μόσε λέγνε αείκα παραστράγκαλα οι θεοί; τεεί ασόλτς τανθρώπς σοφότερος εγώ είμαι. αέτς είπεν ο θεγόν, τουτουρεύ η γαρή*. εγώ όμως εθαρρώ ότι είπενατο για να κομπώνμεν ή για να μασκαρεύ μετεμέν ή ..
εφτουλάεψα .. κι αν μετατό θέλ να λέει άλλον πράμαν ;

εσκώθα απάν επέρα τη στράτα και γυροκλώστουμε ολόερα σ οσπίτιμ. είδεμεν η γαρήμ και ετσάϊξεν. νέπε είπεν με, ντο γυροκλώσκεσαι ολόερα, έπαρ έναν καγάν και θέρτσον το χορτάρ. όλια αναμέντς εγώ να εφτάγατα, ενέγκασεσμεν! .. πίσον εσύ πα έναν πράμαν. βγάλον έναν χοχόλ ασομμάτιαμ. όλιον σο λασίον είσαι ..
με τη γαρήμ κεπορώ να βγάλατα πέρα .. σκώνω τα σέριαμ .. θα λες ατώρα και ποίος επορεί να βγάλιατα πέραν με την γαρήνατ; .. το στόμανατς απάν κιέρτε. όλιον επιτάζμεν. μπα, θα πάγω αυκά σα βυρσοδεψία να νουνίζω .. άμον τον κλέφτην ένοιξα το ξώπορτον και εδέβα πλαν ..
ση στράταν εντάμωσα έναν ασατουνούς που όλιοι λέγνε ότι εν σοφός. εκαλημέρτσατον και εποίασατον σην καλατσήν. κι χρειάσκετε να λέγω τόνεμανατ, είνας ασατουνούς που εφτάνε μας κουμάντον εν. ερχίνεσα να ερωτώ, για να δειξίζω σον χρησμόν ότι εφτάει λάθος, ότι ο άνθρεπος ατός εν κι άλλο σοφός ασεμέν ..
σην καλατσήν απάν θα εξομολογίουμεσας ντο έπαθα. εφάθενμε ότι ατόν πολλά κόσμος εθάρνεν σοφόν, κι άλλο πολλά εφάθενμε ότι ατός ο ίδιον εθάρνεν ότι άμον ατόν σοφός κευρίεται σον Κόσμον όλιον ..

επολέμανα ώραν, να δειξίζατον ότι εθάρνεν ότι έτον σοφός, ενώ πραγματικά κέτον .. και μετατά ντο έλεγα ερχίνεσεν να εχθρεύκετεμεν ..
 
*Πυθία


Πλάτωνας “Απολογία Σωκράτους” σε (εντελώς) ελεύθερη απόδοση ..


ΔΙΑΒΑΣΤΕ ΠΕΡΙΣΣΟΤΕΡΑ:






















Δεν υπάρχουν σχόλια :

Δημοσίευση σχολίου

Παρακαλώ,αφήστε σχόλιο...